खेम राज पाण्डेय, भजनी, कैलाली । कैलालीको भजनी नगरपालिका–३ कुसुमघाटबाट ब्राउन सुगर जस्तो देखिने लागूऔषधसहित टीकापुर अस्पतालमा कार्यरत अहेबसहित तीन जना पक्राउ परेका छन्।
भारतबाट नेपालतर्फ आउँदै गरेका व्यक्तिहरूलाई शंका लागेर चेकजाँच गर्ने क्रममा साँफेबगर नगरपालिका–१० का ३० वर्षीय अनिल भुल, भजनी नगरपालिका–८ का ३२ वर्षीय देवेन्द्र शाही र घोडाघोडी नगरपालिका–२ साडेपानीका ३७ वर्षीय कृष्ण चौधरी पक्राउ परेका हुन्।सशस्त्र प्रहरी बल, नेपाल बीओपी कुसुमघाटका अनुसार उनीहरूको साथबाट लुकाइराखेको अवस्थामा ब्राउन सुगर जस्तो देखिने खैरो पदार्थ तथा से ६ प ३६६२ र भे ३ प ९४८४ नम्बरका दुई वटा मोटरसाइकल बरामद गरिएको छ।
इलाका प्रहरी कार्यालय भजनीले सार्वजनिक गरेको विवरणअनुसार घोडाघोडी नगरपालिका–२ का कृष्ण चौधरीको साथबाट ५१० मिलिग्राम तथा अनिल भुल र देवेन्द्र शाहीको साथबाट ७५० मिलिग्राम ब्राउन सुगर जस्तो देखिने पदार्थ बरामद भएको छ।पक्राउ परेका तीनै जनालाई थप अनुसन्धानका लागि इलाका प्रहरी कार्यालय भजनीमा बुझाइएको सशस्त्र प्रहरी बल, नेपाल बीओपी कुसुमघाटका सशस्त्र प्रहरी निरीक्षक देवेन्द्र नाथले जानकारी दिनुभयो। इलाका प्रहरी कार्यालय भजनीका प्रहरी निरीक्षक खकेन्द्र बहादुर साउदका अनुसार उनीहरूमाथि लागूऔषधसम्बन्धी कसुरमा आवश्यक अनुसन्धान अघि बढाइएको छ।
