भजनी, माघ ४ — भजनी नगरपालिका वडा नं. ३ अन्तर्गत पर्ने डल्फिन क्षेत्रको संरक्षण तथा वातावरणीय स्वच्छताका लागि आज विशेष सरसफाइ कार्यक्रम सम्पन्न भएको छ। वडा नं. ३ का च्याम्पियनहरूको सक्रिय सहभागितामा नदी किनार तथा आसपासका क्षेत्रमा सरसफाइ गरिएको हो।
डल्फिन जस्ता दुर्लभ जलचरको प्राकृतिक बासस्थान मानिने यस क्षेत्रमा पछिल्लो समय फोहोर बढ्दै जान थालेपछि वातावरणीय जोखिम बढेको भन्दै च्याम्पियनहरूको पहलमा सरसफाइ कार्यक्रम आयोजना गरिएको आयोजकले जनाएका छन्। कार्यक्रममा नदी किनारमा फालिएका प्लास्टिक, बोरा, कपडा तथा अन्य फोहोर सामग्री संकलन गरी उचित व्यवस्थापन गरिएको थियो।
सरसफाइ कार्यक्रममा सहभागी च्याम्पियनहरूले वातावरण संरक्षण सबैको साझा दायित्व भएको उल्लेख गर्दै यस्ता अभियानलाई निरन्तरता दिनुपर्नेमा जोड दिएका छन्। उनीहरूले डल्फिन संरक्षणका लागि नदी प्रदूषण नियन्त्रण, प्लास्टिकको प्रयोग न्यूनीकरण र समुदायस्तरमा सचेतना अभिवृद्धि आवश्यक रहेको बताएका छन्।
स्थानीयवासीहरूले पनि च्याम्पियनहरूको यस अभियानको प्रशंसा गर्दै डल्फिन क्षेत्रको संरक्षणमा सबै पक्षको सहयोग आवश्यक रहेको प्रतिक्रिया दिएका छन्। डल्फिन नेपालको महत्त्वपूर्ण जैविक सम्पदा भएकाले यसको संरक्षणका लागि स्थानीय तह, समुदाय र सरोकारवालाहरूको संयुक्त प्रयास अपरिहार्य रहेको उनीहरूको भनाइ छ।
भजनी नगरपालिका वडा नं. ३ का च्याम्पियनहरूद्वारा गरिएको यस सरसफाइ अभियानले वातावरण संरक्षण र जैविक विविधता जोगाउने सन्देश प्रवाह गरेको छ भने आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरिएको छ।